Blog Kesindap Ari Gua Batu

Alkisah, bisi lah beberapa iko lepasan SPM, madi aku empu & kawan-kawan ya berbincang pasal kini tuju udah abis SPM tu. Maioh ke udah ngisi UPU online. Bisi ke bulih, bisi ke enda. Bisi ke nerima tawaran agai Universiti, Matrikulasi, Maktab, Poli, etc. Dalam macam-macam jurusan meh nya.

Siti diperati ke aku ba sekeda. Sida enda milih jurusan. Asal bisi tawaran aja, nurun. Aiyo.. Aku udah kala ngaga kesilapan tu kelia, ngambi jurusan ke nadai sangkut paut enggau pengawa aku diatu. Ukai aku nesal, tang maia abis grad suba, pedis amat ka ngiga pengawa maia nya laban jurusan nya kelalu ‘general’. Tambah mega, maioh amat ga graduan jurusan ke diambi aku nya.

Nya alai, aku meri sepatah dua jako lalau/tangkan ngagai sida ke benong ngerancang tuju pelajar sida. Sebedau ngaga pilihan tauka apply, uji sida ngaga survey dulu sebelah internet. Survey aja utai baka peluang kerja ke bisi ba pengawa siti-siti. Lalu ngiga artikel baka ‘ kerja paling diguna dalam 5 taun ti ka datai’, tauka ‘kerja ke paling tinggi gaji (RM RM RM USD USD USD!!!) dalam 5 taun ti ka datai’, seta utai bukai ke sewaktu dengannya meh. Enggau info tu, sida nemu agi meda sereta ngerancang ni bagi jurusan ke deka sida ya dudi ari. Kerja ke sesuai enggau minat, sesuai enggau gaya hidup sida, sesuai enggau jiwa sida serta nemu pasal scale gaji serta benefit bukai ke bisi ba siti-siti pengawa.

Bala nembiak, enti enda dipadah, nadai ga sida nemu tauka berunding ke pekara bakanya. Ba tuk meh kitai ke udah nyepi asai ya, kongsi enggau sida, penemu & nasihat tang anang memaksa sida. Asuh sida empu mutus ka ni pelajat ke deka sida. (Ngasai ke diri ga suba, enggai dipaksa-paksa.. hehehehe). Kitai ulih ‘list out’ jurusan ya ke manah ba sida, tang sida empu milih.

Pia mega, milih endor belajar tuk pan pekara kedua. Ka disesuai ka enggau budget, penyauh serta kemudahan belajar ke bisi ba institut ke dipilih nya. & ya ke paling penting, palan nya dicertified perintah. Rugi ga belajar betaun-taun, last-last nemu certificate enda diiktiraf. Rugi diri ga.

Pasal belanja sekula, enti baka result manah, nguji apply biasiswa. Maioh bengkah badan-badan ke meri biasiswa. Pia mega, ulih apply belajar baruh kompeni-kompeni ke besai (Tang ila gawa enggau sida) nyema result sida ya manah. Maioh kompeni bisi meri peluang tuk ngagai bala nembiak. Nadai salah bagi sida ya sambil online Facebook tauka browsing youtube, muka siti tab kena ‘ngiga’ info ke bakatu. Enti enda dipadah, maioh ke enda nemu. Nya alai, aku madah ga ditu.. hehehe..

Baka result ke alang-alang nya, kolej swasta bisi ga endor belajar tang beguna ke belanja. Nyadi, bisi meh tabung-tabung baka PTPTN, Loan MARA etc, disedia ka kena mantu sida dalam nerus ka pelajar sida. Tang siti ka diingat, mesti ka bebendar meh ngulih ke result ke manah laban semua duit nya ila, deka dibayar baru. Enggai ke sekeda nyau alang-alang, result nda manah, fail, repeat belama, serta bisi ke setengan jalai. Sesetengah kes pelajar tu, maia ya nurun, tubuh siko. Pulai ila, tubuh tiga. Ni enda, bisi laki/bini & anak.. hehehe.. Bulih uchu ga sida apai indai.. Enti apus, pass, ok meh nya.. dua-dua laki/bini, (tajanpan bisi anak), ulih bekerja enggau sijil/diploma/degree sida.

Bala pelajar ke enda manah result ba SPM nya, nda cukup kredit ka nerus ke pelajar, nadai minat etc. Anang mudah putus asa. Bisi jalai idup. Tajapan sijil akademik/sekula no. 1 kena beridup, tang enti ati liat ngereja pengawa, ulih ga idup nyamai baka urang bukai. Engka siko-siko mensia tuk enda sebaka. Bisi ke pandai sekula. Bisi ke pandai belagu. Bisi ke pandai jari, landik kereja. Sida tauk minta enggau kursus bekerja baka welding, scaffolding, catering, betukang, automotive, painting blasting sereta maioh agi utai bukai. Kursus pandak baka betanam betupi pan bisi. Tanah ke enda diguna ba ulu din tau digaga nyadi ladang capi berekar-ekar.. naa.. ulih ga nyadi usahawan tani.

Maioh meh jalai kena ngidup ke diri. Ila, nyema udah abis sekula, baru sida nemu nama reti idup ke amat-amat. Pejalai ke betul ari diatu nya meh nyadi ka tiang karier sida ya ila. Kaban belayan, network sereta penemu, utai bakatu meh nulung mantu dalam karier sida dudi ari. Aku arap ke semua nembiak ke besekula nya anang mantul-mantul. Tat keh.. orang putih asai nya meh.. uji peda ba tv, bala biologist sebelah national geographic nya.. besekula bendar lalu bekerja.. sebelah kenya, venezuela, brazil.. kerja betangkap ke anaconda, betangkap ke baya.. nyaa. Ukai nyamai kerja nya.. tang nya meh tadi, karier siko-siko nya nitih ke minat & Gaji lah.. Anang enda meras dalam ngidup ke diri & pelajar.. Agi idup agi ngelaban maia bekayau dulu kelia, tau dikena. Tang anang ngayau pala urang.. Diatu kitai ngayau penemu & ngayau ekonomi dalam dunya ke makin ari makin laju singkang ya tuk...

Bah.. anang ga lama endar berunding.. laban speedboat urang bukai terus mecut.. nyema nuan ngetu lama ba jelatong, jauh nuan tinggal... tang anang ga ‘speed’ sebarang tuju. Enggai ka ngelantak pendaie urang.. kena ukum sida pengulu.. Huhuhuhu..

Nangka tu dulu meh.. ngarap ka bisi input positif meh ari blog tu tadi. Ehaa...!